xxxx
Hutzgüri Sissach
x

Us dr Tüfelschuchi

Hutzgüri wie zu Gotthälfszyte

Vo guet unterrichteter Quelle isch d Mäldig cho, s Hutzgüri sig us sim alljöhrliche Summerschloof verwache.  Die bede Eierwybli si no am Wiehnechtschugele versorge gsi, do heb sich das Untier us sim Laubnäscht mit gruchse und stöhne füregmacht. Dr Veedokter het ihns  mit eme halbe Liter Burgermeischterli chöne ruhig stelle. Bis am Dunschtig, 10. Hornig, wirds hoffentlich anehebe, doch denn wirds ins Dorf welle.

Zwar hets am Silveschter  no dervo gschwätzt, es well ins Sahleweidli zum Gotthälf go luege. Doch wos vernoh het wie modern as die läbe dört, hets nüt me welle dervo wüsse. Es chunt jo au ohni Strom, fliessend Wasser und Färnseh us, und gwäsche het es sich au no nie.  Das isch ämel nüt verruckts, die selle sich gar nit eso brüschte mit dem pseudo alltertümliche Läbe.

Do gohts doch lieber in die  modärni Welt uf Sissech. Jetzt heissts ufpasse! Sobalds e Teerstross unter de Füess gspürt und ihns d Strosselampe blände, chames chum me hebe! Hür wärde Huus und Hof vo folgende Lüt speziell gfördet si:

Messer Kurt, Neu-Bürgerli-Chebanntagssuppeversalzer, meischtens unter Druck.

Zeusi Dätwyler, Neuweg-Security-Dame, Chatzemuetter (S'Hutzgüri isch gschlächtslos und nit am streune, bitte nit kastriere!).

Rita Hartl, Jass-Frau  in Hose, mit alljöhrlichem Bartwuchs um e 6. Dezember.

Roger Beugger, 30-jöhrigi Oltiger-Ziegelhofvernichtigsmaschine, macht im Beschäftigungsprogramm vo dr Gmein mit.

Otmar Ankli, frühpensionierte Schlammsuuger, Saftsack-Bierdrinker.

Bienchen Nebiker, Nuggi Tambeuse mit Zweutwohnsitz in Füllschdf.

Schaub Doris, Schofeuse vome gäle Wägeli, Blüemlichind.

Dr BFU-Beuftreiti vo dr Gmein het no folgende Hiwis: Halogenschynwerfer si abzlösche. Blumerabatte si grossrümig abzspere. Gartezwärg (speziell die minderjährige), si in Sicherheit zbringe. Im Hutzgüri isch in gebührender Haltig mit früsch putzte Chlaue, ungschminkt und ohni Mundgruch zbegegne. D Erfahrige vo de letschte Johr hei zeigt, mit gnügend flüssige und feschte  Gobe chöne Schäde vermide, und das Untier beruhigt werde.

Vo Husbsuech wird abgrote, au dr Veedockter macht das numme in zwingende Notfäll. Bim befolge vo allne Vorsichtsmassnahme wirds Schaderisiko plus/minus 0,5 Promill ligge.

Dr Schärmuuser

Home