Kolumne us dr Tüfelschuchi

Sissach  |  S' Hutzgüri will undedure

S' Eierwybli isch grad dra gsi im Hutzgüri die letschte Speckmöcke us de Zeehn zchnüble, do isch si Blick uf e Kalender gfalle. Dick aagstriche isch dr Dunschtig, 7. Hornig 2008, gsi. So früeh wie no nie will sich s'Hutzgüri hür ins Dorf woge! Nach em letschtjöhrige  Versuech uf dr Hauptstroos, wills das Johr no es letschts Mol ungfördet dur s'Pfarrgässli laufe.  Dur d'Mühli chas jo emel sicher nümm. Sitt dr Höpp und s'Netti Stei anegschleickt und Messmöcke ufgstellt hei, chunsch chum me mit em Velo dure. Aber ebe, dr Garte isch allwä z'chlei für em Höpp si Laufgitter...

Item, zum Glück gits jo no anderi Wäg!  Und zwar übere  Bahnhof. Bim neue Bushof wirds Hutzgüri dr Grind chum atätsche. S'Dach isch jo eso wyt obe, dass de au bi schön Wetter im Rege stohsch und dr  Wintersinger het scho Proschpäkt für Doppelstöckerbüs bstellt. Bi dr Underführig wirds denn eher knapp. I bimer noni so sicher öps längt bim undedure laufe. Breit gnue isch si sicher, aber d'Höchi? Mir werdes gseh! Z'hoffen isch numme, dass es nit grad dört s'Bedürfniss het müesse uszträtte. Das gebti den e Souerei, do würd au kei Toi Toi me nütze!

Folgendi Persone werde bätte sich moralisch uf e Heimsuechig vom Hützgüri vorzbereite und die geignete Massnahme yzleite, dass dr Bsuech ohni grösseri Schäde cha über d'Bühni go:

• Treffpunkt Monique und Sissy Wartsaal vo zweu Schweschtere betreut (ohni Orde), für Zweubeiner und Vierpföttler (s'Hutzgüri het 4 Chlaue und e gsundi Lebere, Chatzefuetter frissts nit!)

Bölche Abtrünige Gelterchinder Beizer und Cheigel-Meischtere, do gits nit numme die gröschte, sondern au heissischte Frikadelle

Schoch Sepp Alt Schuelmeischter, het erscht chürzlich si Altersresidenz im Schlumpfedorf bezoge

Linsalata Michele Wasserröhrlibieger mit Hang zu Spekulitis. Schlumpfedorferbouer und Badzimmerplättlidiseiner

Friolet Heidi Vehdoktergattin (nei, nit vo eusem) mit ere unheilbare Halschranked (leider), i hoff es stimmi nöd (um waas gaht's?)

Ryser Christian Harzblogte Schuelhuusabwart, Handballallergiker uf dr suechi nacheme neue Kurort

Clair Remo wächselhafte Guggemusigkant, jetzt nume no dehei Hahn im Chorb

Badello Rebekka FGS Sekelmeischtere; ein Stern, der deinen Namen trägt... (mir hebbe s'Hutzgüri!)

Linde Silvia Rottemuetter vo dr Elektra Sissach,  au mit 50zgi no flexibel (ämmel bim zuemache...)

Dene Persone wird dringend grote sich nach em Ydunkle nümm wyter als dure Tag vo dehei  z'entferne. D'Taschemunition isch vorher im Züghus abzgeh. Die ander Munition isch bereitzstelle und uf Befehl de Eierwybly uszhändige.

Mir bringe nüt, weder südamerikanischi Röseli no yheimisch brennts Wasser, mir hole numme!

Dr Schärmuuser